Chexiyadagi o‘zbek hamjamiyatiga ishonchli yo‘lboshchingiz
Birlaning, hamkorlik qiling va birgalikda rivojlaning.
Biz haqimizda
O‘zbekiston Talabalar Assotsiatsiyasi (Chexiya) — bu Chexiya Respublikasida yashayotgan va o‘qiyotgan o‘zbekistonlik talabalar hamda yoshlarni birlashtirish uchun tashkil etilgan yangi jamoa. Biz muloqot, o‘zaro yordam, madaniy almashinuv va hamkorlik uchun qulay makon yaratishni maqsad qilganmiz.
Bizning vazifamiz — xorijdagi o‘zbek yoshlarini birlashtirish, yangi kelganlarga moslashishda yordam berish va diaspora ichidagi aloqalarni mustahkamlash.
Ta’limiy uchrashuvlar, madaniy tadbirlar va networking faoliyati orqali Assotsiatsiya:
— bilim olish
— tajriba almashish
— milliy an’analarni nishonlash
— yangi do‘stlar orttirish uchun
imkoniyatlar yaratadi
Bu platforma talabalarni qo‘llab-quvvatlash, faol ishtirokni rag‘batlantirish va Chexiyada kuchli, birlashgan jamoa shakllantirishga xizmat qiladi.
Tadbir haqida
2025-yil 18-dekabr kuni Praga shahrida O‘zbekiston Respublikasi Konstitutsiyasining 33 yilligi munosabati bilan tantanali marosim bo‘lib o‘tdi. Ushbu tadbir doirasida Chexiya Respublikasidagi O‘zbekiston Talabalar Assotsiatsiyasi (UzSA-CZ) rasman tashkil etildi.
Assotsiatsiya notijorat va nodavlat tashkilot sifatida tuzilib, Chexiya Respublikasidagi oliy ta’lim muassasalarida tahsil olayotgan o‘zbekistonlik talabalarni birlashtirishni asosiy maqsad qilib olgan. Uning vazifalari talabalarni akademik va ijtimoiy jihatdan qo‘llab-quvvatlash, o‘zaro yordamni rivojlantirish, ta’limiy va madaniy tashabbuslarni ilgari surish hamda O‘zbekiston va Chexiya xalqlari o‘rtasidagi do‘stlik va hamkorlikni mustahkamlashdan iborat.
Assotsiatsiyani tashkil etish tashabbusi Chexiya Respublikasidagi O‘zbekiston Respublikasi Elchixonasi ko‘magida amalga oshirildi. Bu esa xorijdagi o‘zbek yoshlarini qo‘llab-quvvatlash, ularning akademik, madaniy va ijtimoiy hayotdagi faolligini oshirishga bo‘lgan umumiy intilishning ifodasi bo‘ldi. Tadbirda Chexiya Respublikasida tahsil olayotgan o‘zbekistonlik talabalar, shuningdek turli sohalarda faoliyat yuritayotgan vatandoshlar ishtirok etdi. Faxriy mehmonlar orasida Praga Metropoliten Universiteti Maslahat kengashi a’zosi doktor Jaroslav Halík , Pragadagi Kimyo va Texnologiya Universiteti vakili Vojtěch Sýs , Chexiya Hayot Fanlari Universiteti (CZU) IVP loyihasi menejeri Barbora Jordanova, DON’s Kebab va DON’s Pizza hammuassisi Sanjar Khodjayev , shuningdek Start Study asoschisi va UzSA-CZ vakili Daler Kamilovich bor edi.
Shuningdek, tadbirda O‘zbekiston Respublikasining Chexiya Respublikasidagi Elchixonasi vakillari — Muvaqqat ishlar vakili Sardorbek Axmedov, elchixona maslahatchisi Bobur Bakhridinov va konsul Dilshod Sobirov ham ishtirok etdilar.
Tadbirni tashkil etish va homiylik qilishda StartStudy, Translation and Nostrifikation Bureau (TNB), CzechPoint Visa and Consulting Center, DON’s Company, Praga Metropoliten Universiteti, Chexiya Hayot Fanlari Universiteti, Karl Universiteti hamda Pragadagi Kimyo va Texnologiya Universiteti muhim tashkiliy va moddiy yordam ko‘rsatdi.
Marosim O‘zbekiston Respublikasining Davlat madhiyasi ijrosi bilan boshlandi. Shundan so‘ng O‘zbekiston Elchixonasi vakillari tabrik so‘zlari bilan chiqish qilib, Konstitutsiya kunining ahamiyatini ta’kidladilar va Chexiya Respublikasidagi O‘zbekiston Talabalar Assotsiatsiyasi tashkil etilganini rasman e’lon qildilar. Nutqlarda Assotsiatsiyaning asosiy maqsad va ustuvor yo‘nalishlari bayon etilib, uning talabalarni qo‘llab-quvvatlash hamda madaniy va akademik aloqalarni mustahkamlashdagi o‘rni alohida qayd etildi.
Tadbirimizda ishtirok etgan barcha mehmonlarga chuqur minnatdorchilik bildiramiz. Oldinda yana ko‘plab mazmunli uchrashuvlar kutmoqda!
